Fréttir

Það er komin mynd á námskeiðin næsta haust fyrir þá sem eru að brjóta hugann um hvað væri sniðugt að gera.  Sumir vilja skrá sig strax að vori og tryggja sér þannig pláss á vinsælustu námskeiðin, en skráning hefst strax eftir verslunarmannahelgi.   Það verður nýtt og spennandi fræðsluefni sem fylgir lífsstílnum næsta haust.  Vaxtamótunarnámskeiðið Nýtt útlit mun halda áfram og verða hópar að morgni og seinni partinn.  Body Fit námskeið verður kl 6:10 á morgnana og mömmuCrossFit námskeiðið vinsæla verður á sínum stað.  Hægt verður að kaupa 8 vikna aðgang að vefjagigtar Gravitynámskeiðunum og Gravity Extra fyrir þau sem eru 30 kg of þung eða meira verður í boði kl 16:30 þrisvar í viku. Sjá nánar.

Nú er komið að því að gera eitthvað sniðugt og skemmtilegt.  Hlaupum til styrktar Olympíuhópi FRÍ.  2-7 geta skipað boðhlaupssveit og hlaupið 1-2 eða fleiri 3 km hringi í Innbænum.  Byrjum við Leikhúsið kl 17:30 þriðjudaginn 5. júní.  Frábær verðlaun og happdrætti.  Tvær gerðir af sveitum þar sem karlar eru í meirihluta og svo þar sem konur eru í meirihluta.  Veitingastaðirnir Rub 23 og Silva gefa sigursveitunum út að borða og Bjarg gefur Hot Yoga tíma og pott og axlanudd á eftir.  Bautinn, 1862 Nordic Bistro, Svefn og Heilsa, Nettó, Kjarnafæði og fleiri gefa verðlaun og Vífilfell eins og oft áður kemur með svaladrykki fyrir keppendur.Ef þið náið ekki að skrá ykkur í tíma inná hlaup.is er í lagi að mæta og skrá sig á staðnum.

Síðasti Body Balance tíminn á laugardegi er á morgun.  Abba fer út með tímann ef veðrið verður gott.  Það verður Body Balance á miðvikudögum kl 17:30 í allt sumar.  Einstaklega vel samsettir tímar þar sem við hitum upp með Tai Chi æfingum og sólarhyllingu úr Yoga.  Síðan er farið í góðar Yogastöður sem styrkjja allan líkamann og kenna okkur að umgangast musterið sem við búum í.  Kvið og bakæfingar koma að mestu úr Pilates og svo er alltaf góð slökun í lokin.

Afsláttarkortin til framhaldsskólanna hafa verið í sölu allan mánuðinn og verða áfram.  Allir sem skrifuðu sig á listana og verða ekki búnir að borga 10. júní fá reikning í heimabanka. 

Hlaupanámskeiðinu lauk í dag.  En það er hugur í fólki og Sonja, Rannveig og Óli ætla að halda áfram með tíma frá Bjargi á mánudögum og fimmtudögum kl 17:15 og svo er hugmynd um þriðja tímann í Kjarna, kemur í ljós hvenær.  Tímarnir verða opnir fyrir alla sem eiga kort á Bjargi svo nú er um að gera að skella sér út þegar tímum er að fækka hjá okkur inni.  Þeir sem ekki eiga kort geta keypt kreppukort á 5500kr og fengið þannig aðgang að hlaupahópnum og öllum öðrum tímum og aðstöðu á Bjargi.

Nýja vaxtamótunarnámskeiðið hefur alveg slegið í gegn.  Síðasti tíminn hjá þeim sem eru að klára er á þriðjudag og svo byrja tvö ný námskeið á miðvikudaginn.  Abba verður með happdrætti í lokatímanum og kökusmakk og svaladrykk. 

Föstudaginn 1. júní breytist opnunartíminn hjá okkur.  Þann dag verður opið frá 6-14.  Á laugardögum frá 9-13 og lokað á sunnudögum.  Á mánudögum og miðvikudögum verður opið frá 6-19:30 og á þriðjudögum og fimmtudögum frá 8-14 og 16-19:30.  Þetta byggjum við á reynslu síðustu ára.  Það eru fáir að mæta um miðjan daginn og á sunnudögum og snemma á þriðjudögum og fimmtudögum.  Við bjóðum í staðinn frábær kjör á mánaðarkortum út sumarið, 5500kr og þeir sem eiga kreppukort geta æft þegar það er opið, óháð tíma.

Tryggvi var með útitíma í hádeginu í gær, æðislegt.  Hádegishópurinn hér er sá hópur sem fær oftast að vera úti.  Dansinn á laugardögum kl 11 er líka oft á útipallinum.  Sumarið er því komið og verður að sjálfsögðu gott og gjöfult.

Sumarið nálgast og sumarfríin taka við og ferðalög.  Við mætum því með færri tímum seinni partinn en höldum inni megninu af morguntímunum sem voru í vetur og hádegistíminn verður á sínum stað 3x í viku.  Sumartaflan er enn í vinnslu því sumir tímar eru að stækka aftur og því möguleiki að halda þeim inni í júní.  Sumartaflan tekur við 4. júní.

Það eru endalausir frídagar um þessar mundir.  Við verðum með lokað á Hvítasunnudag en á annan í hvítasunnu verður tækjasalurinn opinn frá 10-13, engir tímar verða í boði.